የሦስተኛው ዙር የውጭ ምንዛሬ ግኝት ማበረታቻ የሎተሪ ዕጣ አሸናፊዎች ሽልማታቸውን ከባንኩ ተቀበሉ፡፡
የአራተኛው ዙር ከአዋሽ ይቀበሉ ያሸንፉ መርሐ- ግብር በይፋ ተጀመረ!
አዋሽ ባንክ የውጭ ምንዛሬ ግኝቱን ለማሳደግ አቅዶ ከነሀሴ 23 ቀን 2009 ዓ.ም ጀምሮ ለአራት ወር ያህል ሲያካሄድ የቆየው የሦስተኛው ዙር “ከአዋሽ ይቀበሉ! ያሸንፉ!” የሎተሪ ሽልማት መርሐ-ግብር የካቲት 22 ቀን 2010 ዓ.ም በኢትዮጵያ ብሔራዊ ሎተሪ አስተዳደር ድርጅት አዳራሽ ተሸላሚ ባለዕድለኞችን የመለየትና ዕጣ የማውጣት ፕሮግራም በህዝብ ፊት ይፋ እንደተደረገ ይታወሣል፡፡
መጋቢት 14 ቀን 2010 ዓ.ም ጥሪ የተደረገላቸው እንግዶች በተገኙበት በባንኩ ባልቻ አባ ነፍሶ ህንፃ በተደረገው የሽልማት ስነ-ስርዓት የባንኩ ቺፍ ሪቴልና ኤስ ኤም ኢ ባንኪንግ ኦፊሰር አቶ ሔኖክ ተሰማ ለባለዕድለኞች የእንኳን ደስ አላችሁ መልዕክት ካስተላለፉ በኋላ የአንደኛና የሁለተኛ ዙር የውጭ ምንዛሪ ማስገኛ ሎተሪ ኘሮግራሞች በታቀደላቸው ጊዜ ውስጥ በተሳካ ሁኔታ የተጠናቀቁ ከመሆናቸውም በላይ የዕጣዎቹ አሸናፊዎች ሽልማታቸውን ከባንኩ መቀበላቸውን ገልፀዋል፡፡
በተለያዩ የሀገሪቱ ክልል የሚገኙ 72,558 የባንኩ ደንበኞች ተሳታፊና የእድሉ ተጠቃሚ ያደረገው የሦስተኛው ዙር የውጭ ምንዛሪ ማስገኛ መርሐ-ግብር ለየት የሚየደርገው እንደሌሎቹ ዙሮች በኩፖን ሳይሆን ደንበኞች ለወሰዱት ገንዘብ ወይም ለመነዘሩት የውጭ ምንዛሪ በቀላሉ በሞባይል SMS የኤሌክትሮኒክስ ቁጥር እንዲደርሳቸው መደረጉን ጭምር ሃላፊው አስረድተዋል፡፡
በሦስተኛው ዙር ተዘጋጅተው የነበሩት የሽልማት ዓይነቶች በአምስት የተከፋፈሉ ሲሆን፣ ለአንደኛ ዕጣ የተዘጋጀው የሽልማት ዓይነት ብር 820,000 (ስምንት መቶ ሃያ ሺህ) የሚያወጣ አይሱዙ የጭነት መኪና አሸናፊ አቶ በለጠ አለባቸው ከመጀመርያው ዙር ሃይዩንዳይ ፒክ-አፕ የጭነት መኪና ባለአድለኛ በተመሳሳይ መልኩ የጅማ ከተማ ነዋሪ መሆናቸው አስገራሚ ክስተት ነው ተብሏል፡፡
በሌላ በኩል ከ86 ባለዕድለኞች ውስጥ 43ቱ አ/አበባ፣ የተቀሩት 43ቱ ደግሞ ክልል ላይ የሚገኙ ሲሆን፤ አሰላ ቅርንጫፍ አንድ ባጃጅና አራት የስማርት ሞባይል በአጠቃላይ አምስት ዕጣዎችን በማሸነፍ የሶስተኛው ዙር ‹‹ከአዋሽ ይቀበሉ ያሸንፋ!›› የሎተሪ ሽልማት መርሐ ግብርን በመሪነት አጠናቋል፡፡
ይህ በእንዲህ እንዳለ የአራተኛው ዙር “ከአዋሽ ይቀበሉ! ያሸንፉ!” የሎተሪ መርሐ-ግብር መጋቢት 20 ቀን 2010 ዓ.ም በይፋ የተጀመረ ሲሆን ለሽልማት ከተዘጋጁት እቃዎች መካከል አንድ 15 ሰዎችን መጫን የሚችል ሚኒባስ ተሽከርካሪ፣ 10 ባለ 32 ኢንች LED ቴሌቪዥን እንዲሁም በርካታ የስማርት ሞባይል ስልኮች እንደሚገኙበት ለማወቅ ተችሏል፡፡
